Gardžiuokimės su… Klaipėdos rajono etnokultūros centru
Klaipėdos rajono etnokultūros centras vasario 14 d. 14 val. Doviluose surengs smagių smagiausias Užgavėnes. Ši šventė neįsivaizduojama be gardžiausių blynų. Etnokultūros centras su visais svetingai dalijasi mielinių blynų receptu. Jei gebėsite tarmiškai perskaityti, tai tikrai užsigavėsite gardžiais blynais.
Žėima nenuor trauktėis, gosdėn so ledās i su šašās ont zūbu. Tepkem rėibalās, kepkem blīnus puo galās. Dalėnamies mėilėniu blīnu repciku. Jau galėt bondītėis, ka lig Ožgavieniu dėinuos ėšētom tuokėi, ka nesarmata i sosiedē duotė pakaštavuotė. Sosėtėksem 02 14 d. 14 val. Duovėlūsė „Špic-pe-rī-ri blīnėnie“.
Mėilėniu blīnu repciks
Veiziekėt, dabā jums rēks: posė līterė pėina, ėš akėis posė kiluograma kvėitėniu mėltu, 3 kiaušiu, ėštėrpīnta svėista 50 gramu, 20 gramu šlapiū mėiliū, kuokius 3 šaukštus sokraus, droskas žiūpsnė, kepėma miltieliu, no i aliejaus jau kepėmou, ka naprėsvėlintomiet.
Nu pradžiuos lig gala rēks ėšstavuotė aple valonda.
No, dabā šėtā kontrībės:
- Pėins tor būtė šėlts – pašėlduom.
- Ketvėrta dali poudelė pėina ožpėlam ont mėiliū i makaloujam, kuol ėštėrps. Palėiktam, kuol ont vėršaus būs matītėis balta pota.
- Lėka pėina nu tuo nopėltuojė, tudie ī tou lėkusiuojė dali pėina i sopėlam tou potrelė.
- Ī pėina so mėiliem soberam sokro, droska, ikolam kiaušius i gerā išplakam.
- Mėltus rēk somaišītė so kepėma mėltelēs i ėšsėjuojem par kuokė sėita ī tuo pėina potra.
- Tešla tor būtė kap tėršta smetuona, jē rēk – iberam daugiau mėltu.
- Dabā pajemam abrūsa, oždėngam tešla i palėiktam valonda kėltė. Jē pakajūsė ī šalta, tumet dedam ī uorkaitė, jog nie pečiaus, ni obladės nabtoram. Nustatuom aple 50 laipsniu šėloma.
- Ka jau tešla gerā pasėkel, pėlam ėšlēsta svėista i gerā ėšmakaloujam.
- Īkāitėnam petēlnė, ī pėlam nadaug aliejaus. Tumet so šaukšto dedam tešla, ka blīns ėšēto, no, i kepam, vārtuom, ka gražē aprosto abėdvė posės. Diel smuoka ī tešla dā galem idietė mėrkītu razīnku a agounu, a vuoboulė. Vėskas. Ožgavienės galem švėstė!
