Sekmadienie visi kelē ved ī Judrėnus

Je dabā kuoki diena usuktum ī Judrėnus, ī Dariški, didle nustebtum. Visi lāksta, kāp pu gaisra. Teisībi karštis jautas, vu ugnies namatīti, tik velnišks triukšmus nu lėktuvu pakilimu i nusileidimu. Pri pilkapi muotriška gėlis svadin, kita ikondin laista, vīra tuoras tver, vu muziejininks su kažkuo tilipuonu baras. Tuoliau žiūru galinga teknika, valduoma stombi ūkininka (pats ūkininks smulkus, tik ūkis stuombus), kraun rulius, vu seniuns kažkuokius skaitlius kabin. Mislinu pasicikavīsu, kas do subuvims vīks, kāp užgrājiji muzika, vu par triubēli šauk kolnis, piršta, viens du trīs. Žuodžiu: dainas, šuoke, estrada.

Prikabinis skaitlius ont ruliu seniūns pasōka ont suodības, aš, kāp unsilavinus muotriška, pasilābinau nu ī pasicikavinau.

Sakė, bluoga Zuosi, ka nažina, kad Judrėnu 460-asis minėjims sekmadieni, vu tuo pačiu „Lituanikas“ 88-uosis skrīdi metinis. Pamislinau, gerā ka nasišvaista: cieli du minėjima sīkiu. Da pavardėna žmuonis, katru darba šnek už anus pačius, ī pakvieti užvīkti su sāva plati gimini…

Grīžusi pasisėdau paviesie, ėmiau samsunga i pradėjau kviesti sāva plāti gimini ī Judrėnu 460-uoji minėjima. Bet je temista i nesi mōna giminie, vies tiek atvažiuok, tuo labiau, ka ni duovinu pėrkt narēk, ni čiepù pāsa, tik gēra ukvāta pasiimk. U je esi kon suplanāvis, atšauk, i suk ī Judrėnus, nes sekmadienie visi kele tik ī anus ved.

Pagarbe Zuopija

Parašykite komentarą

El. pašto adresas nebus skelbiamas. Būtini laukeliai pažymėti *

Daugiau straipsnių